Sa pinagsamang operasyon ng Philippine Drug Enforcement Agency-Batangas Provincial Office kasama ang Seaport Interdiction Unit nito at ng Philippine Coast Guard (PCG), naging matagumpay ang pagkumpiska sa nasa 500 na gramo ng hinihinalang shabu na may tinatayang market value na P3.4 milyon.
Ang drug interdiction operation ay naganap sa Batangas Port noong Abril 10. Ang joint operation ay bunsod ng ulat ng isang PDEA agent, na pinaniniwalaang may hawak na ilegal na droga ang isang pasahero ng MV BB Coron. Ang nasabing barko ay nakadaong sa Batangas Port patungo sa Abra de Ilog Port sa Occidental Mindoro.
Mabilis naman na isinagawa ang masusing imbestigasyon at K9 paneling na kinasasangkutan ng mga narcotics detection dog mula sa PCG at PDEA-Batangas.
Pareho namang nagpapakita ng positibong indikasyon sa pulang paper bag kung saan inilagay ang mga sinasabing ilegal na droga.
Ang suspek, isang 36 taong gulang na babae at residente ng Naujan, Oriental Mindoro, ay nasa kustodiya na ng PDEA-Batangas Provincial Office.
BECCA DANTES – HN NEWS CONTRIBUTOR
headlinesngayonblog.wordpress.com 