Nadiskubre ng Senado na aabot sa 19,000 undocumented o hindi matukoy na mga estudyante ang nakatanggap ng voucher mula sa Expanded Government Assistance to Students and Teachers in Private Education (E-GASTPE) program ng Department of Education (DepEd).
Sa pagdinig ng Senate committee on basic education, sinabi ni Rodrick Edsel Malonzo, monitoring and processing officer ng Private Education Assistance Committee (PEAC), mayroong mga eskuwelahan na hindi makapagbigay ng mga dokumento sa ilang mga benepisyaryo ng nasabing programa.
Inihalimbawa ni Malonzo sa isang pribadong paaralan sa Candaba, Pampanga ang mayroong 4,600 undocumented students na itinuturing na voucher program beneficiary (VPB).
“We specifically asked for the class records (of) VPBs…but unfortunately for majority or for a big portion they (were) unable to present [records],” sabi ni Malonzo sa pagdinig.
Puna naman ni Senador Sherwin Gatchalian, chairman ng komite, sa madaling salita ay sinisingil ng mga pribadong paaralan ang gobyerno gayong wala namang maipakitang patunay o dokumento ng mga estudyante na sinasabing benepisyaryo ng voucher program.
Sabi ni Malonzo, sa ngayon may maituturing umano ang mga ito bilang “undocumented students” dahil hindi pa naman napapatunayan na sila’y mga “ghost student”.
Samantala, batay sa pagsisiyasat ng Commission on Audit (COA), nasa 115 senior high school student beneficiaries noong school year 2016-2017 ang ikinunsidera nilang “ghost students” matapos na dalawang beses makakuha ng voucher sa loob ng isang taon.
“In my opinion they are not ghost students. But rather there’s an error in monitoring or error in listing of the beneficiaries,” ayon kay Celso.
Tinatayang P239 milyon ang kailangang i-refund o ibalik sa voucher program dahil sa mga undocumented student.
MICHAEL DINGLASAN – HN INVESTIGATIVE REPORTER
headlinesngayonblog.wordpress.com 