Ibinasura ng Leyte court ang drug case na inihain laban sa umano’y drug lord na si Rolan “Kerwin” Espinosa.
Pinawalang-sala ng Baybay, Leyte Regional Trial Court Branch 14 si Espinosa at mga akusadong sina Brian Anthony Zaldivar, Alfred Cres Batistis, Jose Antipuesto, at Marcelo Adorco dahil sa kulang na ebidensya.
Ipinag-utos din ng korte na ibalik ang P600,000 bail bond noong nakaraang taon para sa kanyang pansamantalang kalayaan.
Sa kabila nito, nahaharap pa rin si Espinosa sa mga reklamo ng money laundering sa Pasay court.
Mayroon din siyang dalawa pang kaso ng illegal possession of dangerous drugs at illegal possession of firearms, na kamakailan ay muling pinabuksan ng Court of Appeals.
Matatandaan na na-indict si Espinosa at mga kasamahan nito ng Department of Justice dahil sa illegal drug trade sa Western Visayas noong Agosto 2021.
Ibinasura ang isa sa mga kaso noong Disyembre 2021, habang na-acquit naman siya at si Adorco sa drug trade charge dahil sa kulang na ebidensya noong Hunyo 2023.
Noong Hunyo 13, 2023, pinayagan si Espinosa na magpiyansa para sa pansamantalang kalayaan ng Baybay City RTC Branch 14.
Noong 2022, binawi niya ang kanyang naunang alegasyon kaugnay sa droga laban kay dating Senador Leila de Lima at sinabing siya ay “coerced, pressured, intimidated and seriously threatened” ng pulisya para idiin si De Lima sa Senate joint committee hearings sa pagpatay sa kanyang amang si Mayor Rolando Espinosa Sr.
“Any and all of his statements given during the Senate hearings, or in the form of sworn written affidavits, against Senator Leila de Lima are not true. He has no dealings with Sen. de Lima and has not given her any money at any given time,” saad sa counter affidavit.
“Any statement he made against the Senator is false and was the result of pressure, coercion, intimidation, and serious threats to his life and family members from the police who instructed him to implicate the Senator into the illegal drug trade,” dagdag pa.
ARVIN SORIANO (Ll.B) – NEWS CONTRIBUTOR
headlinesngayonblog.wordpress.com 